نہ خاک خشک کے ٹھہرے نہ شاخ تر کے رہے

نہ خاک خشک کے ٹھہرے نہ شاخ تر کے رہے

ہم اپنے گھر سے اٹھے کیا کہ دربدر کے رہے

ہماری فکر بھی اک دائرے میں قید رہی

چراغ بھی جو ہوئے ہم تو اک بھنور کے رہے

وہ لوگ تھے جو کہانی کے مرکزی کردار

وہ حرف حرف جیے خواب خواب مر کے رہے

شکستگی تھی مقدر بدن تھے شیشے کے

ذرا سی ٹھیس بہانہ ہوئی بکھر کے رہے

لہو کی لہر اٹھی تھی کہ سر سے گزرے گی

چڑھے تھے کتنے سمندر مگر اتر کے رہے

ہوا کے ساتھ ہی ہو لیں یہ تجربہ بھی سہی

سمٹ سمٹ کے رہے جس قدر بکھر کے رہے

چلو کہیں پئیں بیٹھیں غزل سنائیں سنیں

یہ مسئلے تو مرے دوست عمر بھر کے رہے