na KHak-e-KHushk ke Thahre na shaKH-e-tar ke rahe

na ḳhāk-e-ḳhushk ke Thahre na shāḳh-e-tar ke rahe

ham apne ghar se uThe kyā ki dar-ba-dar ke rahe

hamārī fikr bhī ik dā.ere meñ qaid rahī

charāġh bhī jo hue ham to ik bhañvar ke rahe

vo log the jo kahānī ke markazī kirdār

vo harf-harf jiye ḳhvāb ḳhvāb mar ke rahe

shikastagī thī muqaddar badan the shīshe ke

zarā sī Thes bahāna huī bikhar ke rahe

lahū kī lahr uThī thī ki sar se guzregī

chaḌhe the kitne samandar magar utar ke rahe

havā ke saath hī ho leñ ye tajraba bhī sahī

simaT simaT ke rahe jis qadar bikhar ke rahe

chalo kahīñ piyeñ baiTheñ ġhazal sunā.eñ suneñ

ye mas.ale to mire dost umr-bhar ke rahe

na KHak-e-KHushk ke Thahre na shaKH-e-tar ke rahe

hum apne ghar se uThe kya ki dar-ba-dar ke rahe

hamari fikr bhi ek daere mein qaid rahi

charagh bhi jo hue hum to ek bhanwar ke rahe

wo log the jo kahani ke markazi kirdar

wo harf-harf jiye KHwab KHwab mar ke rahe

shikastagi thi muqaddar badan the shishe ke

zara si Thes bahana hui bikhar ke rahe

lahu ki lahr uThi thi ki sar se guzregi

chaDhe the kitne samandar magar utar ke rahe

hawa ke sath hi ho len ye tajraba bhi sahi

simaT simaT ke rahe jis qadar bikhar ke rahe

chalo kahin piyen baiThen ghazal sunaen sunen

ye masale to mere dost umr-bhar ke rahe