na khuli aankhon se dahshat ka nazara dekhna

na khulī āñkhoñ se dahshat kā nazārā dekhnā

jo hamārā hai use auroñ kā hotā dekhnā

rū-ba-rū us ko nazar bhar dekh bhī sakte nahīñ

haa.e kitnā dukh bharā hai ḳhud ko aisā dekhnā

kyā ajab sā rog bīnā.ī ko merī lag gayā

har kisī chehre meñ bas us kā hī chehra dekhnā

ishq meñ pathrā chukī āñkhoñ se hai mushkil bahut

chāñd ko Thahre hue paanī meñ chaltā dekhnā

haa.e kyā manzar-kashī ubhrī hai is tasvīr meñ

rotī āñkhoñ se kisī pyāse kā dariyā dekhnā

raat bhar bechainiyāñ sone nahīñ detīñ mujhe

aur din bhar raat ke hone kā rasta dekhnā

maut ham se do qadam ke fāsle par hai khaḌī

ab bahut dilchasp hogā ye tamāshā dekhnā

na khuli aankhon se dahshat ka nazara dekhna

jo hamara hai use auron ka hota dekhna

ru-ba-ru us ko nazar bhar dekh bhi sakte nahin

hae kitna dukh bhara hai KHud ko aisa dekhna

kya ajab sa rog binai ko meri lag gaya

har kisi chehre mein bas us ka hi chehra dekhna

ishq mein pathra chuki aankhon se hai mushkil bahut

chand ko Thahre hue pani mein chalta dekhna

hae kya manzar-kashi ubhri hai is taswir mein

roti aankhon se kisi pyase ka dariya dekhna

raat bhar bechainiyan sone nahin detin mujhe

aur din bhar raat ke hone ka rasta dekhna

maut hum se do qadam ke fasle par hai khaDi

ab bahut dilchasp hoga ye tamasha dekhna