na KHushi achchhi hai ai dil na malal achchha hai

na ḳhushī achchhī hai ai dil na malāl achchhā hai

yaar jis haal meñ rakkhe vahī haal achchhā hai

dil-e-betāb ko pahlū meñ machalte kyā der

sun le itnā kisī kāfir kā jamāl achchhā hai

baat ulTī vo samajhte haiñ jo kuchh kahtā huuñ

ab ke pūchhā to ye kah dūñgā ki haal achchhā hai

sohbat ā.īne se bachpan meñ ḳhudā ḳhair kare

vo abhī se kahīñ samjheñ na jamāl achchhā hai

mushtarī dil kā ye kah kah ke banāyā un ko

chiiz anokhī hai na.ī jins hai maal achchhā hai

chashm o dil jis ke hoñ mushtāq vo sūrat achchhī

jis kī tārīf ho ghar ghar vo jamāl achchhā hai

yaar tak roz pahuñchtī hai burā.ī merī

rashk hotā hai ki mujh se mirā haal achchhā hai

apnī āñkheñ nazar aatī haiñ jo achchhī un ko

jānte haiñ mire bīmār kā haal achchhā hai

bātoñ bātoñ meñ lagā laa.e hasīnoñ ko 'jalīl'

tum ko bhī sehr-bayānī meñ kamāl achchhā hai

na KHushi achchhi hai ai dil na malal achchha hai

yar jis haal mein rakkhe wahi haal achchha hai

dil-e-betab ko pahlu mein machalte kya der

sun le itna kisi kafir ka jamal achchha hai

baat ulTi wo samajhte hain jo kuchh kahta hun

ab ke puchha to ye kah dunga ki haal achchha hai

sohbat aaine se bachpan mein KHuda KHair kare

wo abhi se kahin samjhen na jamal achchha hai

mushtari dil ka ye kah kah ke banaya un ko

chiz anokhi hai nai jins hai mal achchha hai

chashm o dil jis ke hon mushtaq wo surat achchhi

jis ki tarif ho ghar ghar wo jamal achchha hai

yar tak roz pahunchti hai burai meri

rashk hota hai ki mujh se mera haal achchha hai

apni aankhen nazar aati hain jo achchhi un ko

jaante hain mere bimar ka haal achchha hai

baaton baaton mein laga lae hasinon ko 'jalil'

tum ko bhi sehr-bayani mein kamal achchha hai