na koi chhat na koi saeban rakhte hain

na koī chhat na koī sā.ebān rakhte haiñ

ham apne sar pe khulā āsmān rakhte haiñ

bachā ke ham ye buzurgoñ kī shaan rakhte haiñ

nahīñ hai sham.a magar sham.a-dān rakhte haiñ

gale bhī milte haiñ hāthoñ ko bhī milāte haiñ

ġhazab kī duurī bhī ham darmiyān rakhte haiñ

ḳhudāyā terā karam hai ki kuchh na rakhte hue

ham apnī muTThī meñ saarā jahān rakhte haiñ

sharāfatoñ se ta.alluq nahīñ hai kuchh un kā

vo nīche log jo ūñchā makān rakhte haiñ

zamāna kis liye ham ko talāsh kartā hai

na koī naam na ham kuchh nishān rakhte haiñ

bahut sañbhāl ke rakhnā qadam tum un par bhī

tumheñ ḳhabar nahīñ patthar bhī jaan rakhte haiñ

amīr-e-shahr kī dāvat qubūl karte nahīñ

tire faqīr baḌī aan baan rakhte haiñ

mizāj kis ne bigāḌā hamāre bachchoñ kā

qalam ke badle ye tīr-o-kamān rakhte haiñ

ḳhudā kā shukr ki TuuTe hue haiñ par phir bhī

ham apne zehn meñ ūñchī uḌaan rakhte haiñ

'zafar' unheñ bhī kabhī tum paḌho unheñ bhī suno

ḳhamosh lab bhī ka.ī dāstān rakhte haiñ

na koi chhat na koi saeban rakhte hain

hum apne sar pe khula aasman rakhte hain

bacha ke hum ye buzurgon ki shan rakhte hain

nahin hai shama magar shama-dan rakhte hain

gale bhi milte hain hathon ko bhi milate hain

ghazab ki duri bhi hum darmiyan rakhte hain

KHudaya tera karam hai ki kuchh na rakhte hue

hum apni muTThi mein sara jahan rakhte hain

sharafaton se talluq nahin hai kuchh un ka

wo niche log jo uncha makan rakhte hain

zamana kis liye hum ko talash karta hai

na koi nam na hum kuchh nishan rakhte hain

bahut sanbhaal ke rakhna qadam tum un par bhi

tumhein KHabar nahin patthar bhi jaan rakhte hain

amir-e-shahr ki dawat qubul karte nahin

tere faqir baDi aan ban rakhte hain

mizaj kis ne bigaDa hamare bachchon ka

qalam ke badle ye tir-o-kaman rakhte hain

KHuda ka shukr ki TuTe hue hain par phir bhi

hum apne zehn mein unchi uDan rakhte hain

'zafar' unhen bhi kabhi tum paDho unhen bhi suno

KHamosh lab bhi kai dastan rakhte hain