na koi harf-e-dua arz-e-tamanna bhi nahin

na koī harf-e-duā arz-e-tamannā bhī nahīñ

ab na maulā hai merā aur maiñ banda bhī nahīñ

mere chehre se milā kartī hai us kī sūrat

us kī sūrat sā mire paas to chehra bhī nahīñ

rabbī-arnī kā ye hāsil rahā bīnā.ī ga.ī

aise dekhā ki use Thiik se dekhā bhī nahīñ

pahle fir.aun marā baad meñ muusā bhī mare

ek mar jaatā hai ik maut se martā bhī nahīñ

zāt-e-vāhid hai agar vo to maiñ fard-e-vahdat

us meñ aur mujh meñ koī farq ziyāda bhī nahīñ

ye to ik khel hai aur khel balā kā 'ālam'

lailā kā qais nahīñ qais kī lailā bhī nahīñ

na koi harf-e-dua arz-e-tamanna bhi nahin

ab na maula hai mera aur main banda bhi nahin

mere chehre se mila karti hai us ki surat

us ki surat sa mere pas to chehra bhi nahin

rabbi-arni ka ye hasil raha binai gai

aise dekha ki use Thik se dekha bhi nahin

pahle firaun mara baad mein musa bhi mare

ek mar jata hai ek maut se marta bhi nahin

zat-e-wahid hai agar wo to main fard-e-wahdat

us mein aur mujh mein koi farq ziyaada bhi nahin

ye to ek khel hai aur khel bala ka 'alam'

laila ka qais nahin qais ki laila bhi nahin