نہ کوئی خواہش نہ کوئی حسرت نہ کوئی رنج و ملال مجھ کو

نہ کوئی خواہش نہ کوئی حسرت نہ کوئی رنج و ملال مجھ کو

رلا رہا ہے کئی دنوں سے نہ جانے کس کا خیال مجھ کو

یہ کس نے نیندیں چرائیں میری یہ کس نے میرا سکون چھینا

یہ کون ہے جو کہ کر رہا ہے ذرا ذرا پائمال مجھ کو

مرے تصور کی چاندنی میں تمہارا چہرہ چمک رہا ہے

نہ گل کا چرچا کرے کوئی اب نہ چاند کی دے مثال مجھ کو

مرا تجھے گر خیال ہے کچھ مرے دکھوں کا ملال ہے کچھ

بکھر نہ جاؤں میں ٹوٹ کر کے خدارا آ کے سنبھال مجھ کو

ابھر رہی ہوں غموں سے نصرتؔ ملی ہے ایسی مجھے مسرت

کوئی بتا دے یہ حاسدوں سے ابھی نہیں ہے زوال مجھ کو