na koi KHwahish na koi hasrat na koi ranj-o-malal mujhko

na koī ḳhvāhish na koī hasrat na koī ranj-o-malāl mujh ko

rulā rahā hai ka.ī dinoñ se na jaane kis kā ḳhayāl mujh ko

ye kis ne nīñdeñ churā.īñ merī ye kis ne merā sukūn chhīnā

ye kaun hai jo ki kar rahā hai zarā zarā pā.emāl mujh ko

mire tasavvur kī chāñdnī meñ tumhārā chehra chamak rahā hai

na gul kā charchā kare koī ab na chāñd kī de misāl mujh ko

mirā tujhe gar ḳhayāl hai kuchh mire dukhoñ kā malāl hai kuchh

bikhar na jā.ūñ maiñ TuuT kar ke ḳhudārā aa ke sañbhāl mujh ko

ubhar rahī huuñ ġhamoñ se 'nusrat' milī hai aisī mujhe masarrat

koī batā de ye hāsidoñ se abhī nahīñ hai zavāl mujh ko

na koi KHwahish na koi hasrat na koi ranj-o-malal mujh ko

rula raha hai kai dinon se na jaane kis ka KHayal mujh ko

ye kis ne ninden churain meri ye kis ne mera sukun chhina

ye kaun hai jo ki kar raha hai zara zara paemal mujh ko

mere tasawwur ki chandni mein tumhaara chehra chamak raha hai

na gul ka charcha kare koi ab na chand ki de misal mujh ko

mera tujhe gar KHayal hai kuchh mere dukhon ka malal hai kuchh

bikhar na jaun main TuT kar ke KHudara aa ke sanbhaal mujh ko

ubhar rahi hun ghamon se 'nusrat' mili hai aisi mujhe masarrat

koi bata de ye hasidon se abhi nahin hai zawal mujh ko