na koi saya na koi makan rakhte hain

na koī saaya na koī makān rakhte haiñ

ham apne sar pe khulā āsmān rakhte haiñ

har ek baat pe ḳhāmosh rah nahīñ sakte

azīzo ham bhī to muñh meñ zabān rakhte haiñ

buzurg de ke ga.e the jise virāsat meñ

vahī mizāj vahī ān-bān rakhte haiñ

zamāna siikh le ham se fan-e-sipah-gīrī

hañsī ke tiir laboñ kī kamān rakhte haiñ

shikast paa.ī hai jis se har ek dariyā ne

laboñ pe pyaas kī aisī chaTān rakhte haiñ

bulandiyāñ haiñ ibārat unhīñ parindoñ se

jo āsmān se ūñchī uḌaan rakhte haiñ

bas itnī baat pe ḳhā.if haiñ gulsitāñ vaale

qafas-nasīb baḌā ḳhāndān rakhte haiñ

na koi saya na koi makan rakhte hain

hum apne sar pe khula aasman rakhte hain

har ek baat pe KHamosh rah nahin sakte

azizo hum bhi to munh mein zaban rakhte hain

buzurg de ke gae the jise wirasat mein

wahi mizaj wahi aan-ban rakhte hain

zamana sikh le hum se fan-e-sipah-giri

hansi ke tir labon ki kaman rakhte hain

shikast pai hai jis se har ek dariya ne

labon pe pyas ki aisi chaTan rakhte hain

bulandiyan hain ibarat unhin parindon se

jo aasman se unchi uDan rakhte hain

bas itni baat pe KHaif hain gulsitan wale

qafas-nasib baDa KHandan rakhte hain