na koi subh ka manzar na sham ki taswir

na koī sub.h kā manzar na shaam kī tasvīr

sukūt khīñch rahā hai kalām kī tasvīr

rakheñge naqsh mohammad kā dil meñ taaki rahe

hamāre paas hamāre imaam kī tasvīr

ye sub.h-o-shām ke manzar meñ vaqt kā kirdār

ye roz-o-shab haiñ 'ajab ehtimām kī tasvīr

piyeñge dil se shahādat kā jaam barsar-e-ḳhāk

ki hai ye maut hamāre davām kī tasvīr

jahāñ-jahāñ se vo guzrā zamāna ruk gayā thā

har ik maqām ne khīñchī ḳhirām kī tasvīr

vo aañkh jis ko mayassar ho vo nahīñ rakhtā

ye jām-e-jam kā tasavvur ye jaam kī tasvīr

zamīñ pe bijlī girā.ī ga.ī hai yuuñ 'zahrāb'

banā rahā hai ḳhudā inhidām kī tasvīr

na koi subh ka manzar na sham ki taswir

sukut khinch raha hai kalam ki taswir

rakhenge naqsh mohammad ka dil mein taki rahe

hamare pas hamare imam ki taswir

ye subh-o-sham ke manzar mein waqt ka kirdar

ye roz-o-shab hain 'ajab ehtimam ki taswir

piyenge dil se shahadat ka jam barsar-e-KHak

ki hai ye maut hamare dawam ki taswir

jahan-jahan se wo guzra zamana ruk gaya tha

har ek maqam ne khinchi KHiram ki taswir

wo aankh jis ko mayassar ho wo nahin rakhta

ye jam-e-jam ka tasawwur ye jam ki taswir

zamin pe bijli girai gai hai yun 'zahrab'

bana raha hai KHuda inhidam ki taswir