na koi uljhan na dil pareshan na koi dard-e-nihan tha pahle

na koī uljhan na dil pareshāñ na koī dard-e-nihāñ thā pahle

hamāre hāthoñ meñ titliyāñ thiiñ ye dil bahut shādmāñ thā pahle

har ek titlī pe bār-e-ġham hai aur andalīboñ kī aañkh nam hai

jahāñ pe ab ḳhaak uḌ rahī hai yahīñ kahīñ gulsitāñ thā pahle

na buġhz dil meñ rahe na nafrat bas ek duuje se ho mohabbat

ham aao tā'mīr phir se kar leñ vahī jo hindostāñ thā pahle

vo merī chāhat kī raushnī se nikal ke zulmat meñ jī rahā thā

yaqīn mujh ko nahīñ thā lekin vo mujh se kuchh bad-gumāñ thā pahle

hamārī holī hai 'iid hai vo har ik ḳhushī kī umiid hai vo

vo paas aa.e to us se pūchheñ tū itne din se kahāñ thā pahle

tumhārī duniyā meñ ā.eñge ham tumheñ gale se lagā.eñge ham

janāb ham ko mile jo fursat darāz-e-kār-e-jahāñ se pahle

hai vahshatoñ kā ye daur kaisā kyoñ dahshateñ sar uThā rahī haiñ

kahāñ se le aa.eñ DhūñD kar ham vahī jo amn-o-amāñ thā pahle

na koi uljhan na dil pareshan na koi dard-e-nihan tha pahle

hamare hathon mein titliyan thin ye dil bahut shadman tha pahle

har ek titli pe bar-e-gham hai aur andalibon ki aankh nam hai

jahan pe ab KHak uD rahi hai yahin kahin gulsitan tha pahle

na bughz dil mein rahe na nafrat bas ek duje se ho mohabbat

hum aao ta'mir phir se kar len wahi jo hindostan tha pahle

wo meri chahat ki raushni se nikal ke zulmat mein ji raha tha

yaqin mujh ko nahin tha lekin wo mujh se kuchh bad-guman tha pahle

hamari holi hai 'id hai wo har ek KHushi ki umid hai wo

wo pas aae to us se puchhen tu itne din se kahan tha pahle

tumhaari duniya mein aaenge hum tumhein gale se lagaenge hum

janab hum ko mile jo fursat daraaz-e-kar-e-jahan se pahle

hai wahshaton ka ye daur kaisa kyon dahshaten sar uTha rahi hain

kahan se le aaen DhunD kar hum wahi jo amn-o-aman tha pahle