na kufr ki na kabhi humse din ki baat karo

na kufr kī na kabhī ham se diiñ kī baat karo

kisī kī zulf kisī kī jabīñ kī baat karo

fuzūl kyuuñ falak-e-haftamīñ kī baat karo

jahāñ pahuñch ho tumhārī vahīñ kī baat karo

ye baar baar hai kyā zikr zāl-e-duniyā kā

kisī hasīñ kisī zohra-jabīñ kī baat karo

basī huī hai jo ḳhvāboñ meñ roz-e-avval se

agar karo to usī nāznīñ kī baat karo

shu.ūr-o-aql meñ yaḳh-bastagī kā aalam hai

nigāh-e-garm ruḳh-e-ātishīñ kī baat karo

junūñ-zadoñ ko ab asbāb-e-hosh hai la.anat

na jeb kī na kabhī āstīñ kī baat karo

hazār-rang hai jis se hayāt kā dāman

karo to husn-e-hayāt-āfrīñ kī baat karo

ye kyā ki jab bhī milo ro.e jaao qismat ko

kabhī to ḳhair se azm-o-yaqīñ kī baat karo

janāb-e-shaiḳh bas itnī sī arz hai apnī

zamīñ pe rah ke na arsh-e-barīñ kī baat karo

vatan meñ rah ke vatan kā ho tazkira pahle

phir iḳhtiyār hai chāhe kahīñ kī baat karo

azal se god meñ jis kī pale ho ai 'tālib'

zabān-e-shukr se us sar-zamīñ kī baat karo

na kufr ki na kabhi hum se din ki baat karo

kisi ki zulf kisi ki jabin ki baat karo

fuzul kyun falak-e-haftamin ki baat karo

jahan pahunch ho tumhaari wahin ki baat karo

ye bar bar hai kya zikr zal-e-duniya ka

kisi hasin kisi zohra-jabin ki baat karo

basi hui hai jo KHwabon mein roz-e-awwal se

agar karo to usi naznin ki baat karo

shuur-o-aql mein yaKH-bastagi ka aalam hai

nigah-e-garm ruKH-e-atishin ki baat karo

junun-zadon ko ab asbab-e-hosh hai lanat

na jeb ki na kabhi aastin ki baat karo

hazar-rang hai jis se hayat ka daman

karo to husn-e-hayat-afrin ki baat karo

ye kya ki jab bhi milo roe jao qismat ko

kabhi to KHair se azm-o-yaqin ki baat karo

janab-e-shaiKH bas itni si arz hai apni

zamin pe rah ke na arsh-e-barin ki baat karo

watan mein rah ke watan ka ho tazkira pahle

phir iKHtiyar hai chahe kahin ki baat karo

azal se god mein jis ki pale ho ai 'talib'

zaban-e-shukr se us sar-zamin ki baat karo