na kyun tir-e-nazar guzre jigar se

na kyuuñ tīr-e-nazar guzre jigar se

kahīñ ye vaar rukte haiñ sipar se

kisī se ishq apnā kyā chhupā.eñ

mohabbat Tapkī paḌtī hai nazar se

huī hai un ke mushtāqoñ se rah band

vo mere ghar bhalā aa.eñ kidhar se

bhalā dil kā kahāñ milnā ki un kī

nazar bhī to nahīñ miltī nazar se

mujhe dīvār hairat ne banāyā

gayā hai jhāñk kar ye kaun dar se

kabhī TūTeñ kabhī sayyād kaaTe

ġharaz uḌnā nahīñ hai bāl-o-par se

kahāñ kī pairvī jab qasd ye ho

ki aage baḌh ke chaliye rāhbar se

na kholeñge to ye TūTegā āḳhir

ki maiñ Takrā rahā huuñ sar ko dar se

laḌā.ī kā na maiñ toḌūñgā phir taar

zarā sī chheḌ ho jaa.e udhar se

agar jaatī hai jaañ miltā hai jānāñ

hameñ to naf.a afzūñ hai zarar se

rahā dil meñ na hargiz tiir us kā

hameñ khaTkā yahī thā peshtar se

sivā.e shar na kuchh dekhā adū se

ḳhudā mahfūz rakkhe us bashar se

huā go pā.emāl-e-ġhair 'majrūh'

na sarkā yaar ke par rahguzar se

na kyun tir-e-nazar guzre jigar se

kahin ye war rukte hain sipar se

kisi se ishq apna kya chhupaen

mohabbat Tapki paDti hai nazar se

hui hai un ke mushtaqon se rah band

wo mere ghar bhala aaen kidhar se

bhala dil ka kahan milna ki un ki

nazar bhi to nahin milti nazar se

mujhe diwar hairat ne banaya

gaya hai jhank kar ye kaun dar se

kabhi TuTen kabhi sayyaad kaTe

gharaz uDna nahin hai baal-o-par se

kahan ki pairwi jab qasd ye ho

ki aage baDh ke chaliye rahbar se

na kholenge to ye TuTega aaKHir

ki main Takra raha hun sar ko dar se

laDai ka na main toDunga phir tar

zara si chheD ho jae udhar se

agar jati hai jaan milta hai jaanan

hamein to nafa afzun hai zarar se

raha dil mein na hargiz tir us ka

hamein khaTka yahi tha peshtar se

siwae shar na kuchh dekha adu se

KHuda mahfuz rakkhe us bashar se

hua go paemal-e-ghair 'majruh'

na sarka yar ke par rahguzar se