na latif sham ki justuju na hasin sahar ki talash hai

na latīf shaam kī justujū na hasīñ sahar kī talāsh hai

jo nazar nazar ko navāz de mujhe us nazar kī talāsh hai

mire ham-safar tujhe kyā ḳhabar ye nazar nazar kī talāsh hai

mirī rāhbar ko hai justujū tujhe rāhbar kī talāsh hai

jo ajal ko jaane hayāt-e-nau jo hayāt-e-nau ko ajal kahe

mujhe rah-guzār-e-hayāt meñ usī ham-safar kī talāsh hai

na ho farq dair-o-haram jahāñ na ho apnā apnā sanam jahāñ

usī rahguzar kī talāsh thī usī rahguzar kī talāsh hai

jo bas ek pahlī nigāh meñ mire dil kā raaz samajh sake

mujhe ibtidā-e-hayāt se isī dīda-var kī talāsh hai

mire zauq-e-dard kā hausla sar-e-bazm kahtā hai barmalā

vo 'azīz' kaif se duur hai jise chāragar kī talāsh hai

na latif sham ki justuju na hasin sahar ki talash hai

jo nazar nazar ko nawaz de mujhe us nazar ki talash hai

mere ham-safar tujhe kya KHabar ye nazar nazar ki talash hai

meri rahbar ko hai justuju tujhe rahbar ki talash hai

jo ajal ko jaane hayat-e-nau jo hayat-e-nau ko ajal kahe

mujhe rah-guzar-e-hayat mein usi ham-safar ki talash hai

na ho farq dair-o-haram jahan na ho apna apna sanam jahan

usi rahguzar ki talash thi usi rahguzar ki talash hai

jo bas ek pahli nigah mein mere dil ka raaz samajh sake

mujhe ibtida-e-hayat se isi dida-war ki talash hai

mere zauq-e-dard ka hausla sar-e-bazm kahta hai barmala

wo 'aziz' kaif se dur hai jise chaaragar ki talash hai