na mah-ru na kisi mahtab se hui thi

na māh-rū na kisī māhtāb se huī thī

hameñ to pahlī mohabbat kitāb se huī thī

fareb-e-kul hai zamīñ aur namūna-e-azdād

ki ibtidā hī gunāh-o-savāb se huī thī

bas ek shab kī kahānī nahīñ ki bhuul sakeñ

har ek shab hī mumāsil itaab se huī thī

vajūd-e-chashm thā Thahre samundaroñ kī misāl

numūd-e-hālat-e-dil ik habāb se huī thī

jazā-e-ishq-e-haqīqī rahī talab apnī

ḳhatā-e-ishq-e-majāzī janāb se huī thī

usī se tīra-shabī meñ hai manzaroñ kā vajūd

vo raushnī jo mashiyyat ke baab se huī thī

vahī to jehd-e-musalsal kī ibtidā thī 'alī'

jab āshnā.ī qadam kī rikāb se huī thī

na mah-ru na kisi mahtab se hui thi

hamein to pahli mohabbat kitab se hui thi

fareb-e-kul hai zamin aur namuna-e-azdad

ki ibtida hi gunah-o-sawab se hui thi

bas ek shab ki kahani nahin ki bhul saken

har ek shab hi mumasil itab se hui thi

wajud-e-chashm tha Thahre samundaron ki misal

numud-e-haalat-e-dil ek habab se hui thi

jaza-e-ishq-e-haqiqi rahi talab apni

KHata-e-ishq-e-majazi janab se hui thi

usi se tira-shabi mein hai manzaron ka wajud

wo raushni jo mashiyyat ke bab se hui thi

wahi to jehd-e-musalsal ki ibtida thi 'ali'

jab aashnai qadam ki rikab se hui thi