na main dariya na mujh mein zoam koi be-karani ka

na maiñ dariyā na mujh meñ zo.am koī be-karānī kā

ki maiñ huuñ bulbule kī shakl meñ ehsās paanī kā

mohabbat meñ tirī apnī zabāñ ko sī liyā maiñ ne

asar zaa.il na ho jaa.e tirī jādū-bayānī kā

ajab kyā hai jo merī dāstān-e-ḳhūñ-chakāñ se bhī

koī pahlū nikal aa.e kisī kī shādmānī kā

maiñ apne paañv kī zanjīr ik din ḳhud hī kāTūñgā

hadaf banñā nahīñ mujh ko kisī kī mehrbānī kā

tumhāre sāmne aa.uuñ tumheñ apnī safā.ī duuñ

sabab ma.alūm ho tab nā tumhārī bad-gumānī kā

mirā siina hazāroñ chīḳhtī rūhoñ kā maskan hai

vasīla huuñ maiñ gūñgī hasratoñ kī tarjumānī kā

hamārā ahd bhī likkhe alif-lailā ke jaisā kuchh

badalnā chāhiye ab rañg kuchh qissa-kahānī kā

nahīñ tere liye ye do minute kī chup nahīñ kaafī

tirā ġham mustahiq hai umr bhī kī nauha-ḳhvānī kā

mirī tā.īd meñ bhī ab kisī kā hoñT to kāñpe

koī to dard bāñTe aa.e merī be-zabānī kā

na main dariya na mujh mein zoam koi be-karani ka

ki main hun bulbule ki shakl mein ehsas pani ka

mohabbat mein teri apni zaban ko si liya main ne

asar zail na ho jae teri jadu-bayani ka

ajab kya hai jo meri dastan-e-KHun-chakan se bhi

koi pahlu nikal aae kisi ki shadmani ka

main apne panw ki zanjir ek din KHud hi kaTunga

hadaf banna nahin mujh ko kisi ki mehrbani ka

tumhaare samne aaun tumhein apni safai dun

sabab malum ho tab na tumhaari bad-gumani ka

mera sina hazaron chiKHti ruhon ka maskan hai

wasila hun main gungi hasraton ki tarjumani ka

hamara ahd bhi likkhe alif-laila ke jaisa kuchh

badalna chahiye ab rang kuchh qissa-kahani ka

nahin tere liye ye do minute ki chup nahin kafi

tera gham mustahiq hai umr bhi ki nauha-KHwani ka

meri taid mein bhi ab kisi ka honT to kanpe

koi to dard banTe aae meri be-zabani ka