na main haal-e-dil se ghafil na hun ashk-bar ab tak

na maiñ hāl-e-dil se ġhāfil na huuñ ashk-bār ab tak

mirī bebasī pe bhī hai mujhe iḳhtiyār ab tak

mire bāġh-e-dil pe āḳhir ye bahār bhī sitam hai

jo gulāb ham ne bo.e vo haiñ ḳhār-dār ab tak

koī aas mujh ko roke tirī justujū se kāfir

maiñ agarche ho chukā thā kabhī sharmsār ab tak

ye nasīb hī nahīñ thā ki maiñ apnā haal jī luuñ

maiñ huuñ apnī ḳhastagī kā ḳhudī sogvār ab tak

jo bahā.e chand qatre jo sajā.e kuchh tabassum

mujhe aisī ik ḳhushī kā rahā intizār ab tak

ye ajiib dāstāñ hai mire be-niyāz dil kī

jo use samajh na paayā hai usī se pyaar ab tak

maiñ kisī ke ashk pochhūñ to vo ġham-gusār merā

ye samajh ke dard Dhoyā maiñ ne baar baar ab tak

maiñ kise kahūñ ai 'bāliġh' mirā ġham-navāz tū hai

mirī bekasī kā kis ko huā e'tibār ab tak

na main haal-e-dil se ghafil na hun ashk-bar ab tak

meri bebasi pe bhi hai mujhe iKHtiyar ab tak

mere bagh-e-dil pe aaKHir ye bahaar bhi sitam hai

jo gulab hum ne boe wo hain KHar-dar ab tak

koi aas mujh ko roke teri justuju se kafir

main agarche ho chuka tha kabhi sharmsar ab tak

ye nasib hi nahin tha ki main apna haal ji lun

main hun apni KHastagi ka KHudi sogwar ab tak

jo bahae chand qatre jo sajae kuchh tabassum

mujhe aisi ek KHushi ka raha intizar ab tak

ye ajib dastan hai mere be-niyaz dil ki

jo use samajh na paya hai usi se pyar ab tak

main kisi ke ashk pochhun to wo gham-gusar mera

ye samajh ke dard Dhoya main ne bar bar ab tak

main kise kahun ai 'baaligh' mera gham-nawaz tu hai

meri bekasi ka kis ko hua e'tibar ab tak