na main samjha na aap aae kahin se

na maiñ samjhā na aap aa.e kahīñ se

pasīna pochhiye apnī jabīñ se

chalī aatī hai hoñToñ par shikāyat

nadāmat Tapkī paḌtī hai jabīñ se

agar sach hai hasīnoñ meñ talavvun

to hai ummīd-e-vasl un kī nahīñ se

kahāñ kī dil-lagī kaisī mohabbat

mujhe ik laag hai jān-e-hazīñ se

idhar laao zarā dast-e-hinā.ī

pakaḌ deñ chor dil kā ham yahīñ se

junūñ meñ is ġhazab kī ḳhaak uḌaa.ī

banāyā āsmāñ ham ne zamīñ se

vahāñ āshiq-kushī hai ain-īmāñ

unheñ kyā bahs 'anvar' kufr-o-dīñ se

na main samjha na aap aae kahin se

pasina pochhiye apni jabin se

chali aati hai honTon par shikayat

nadamat Tapki paDti hai jabin se

agar sach hai hasinon mein talawwun

to hai ummid-e-wasl un ki nahin se

kahan ki dil-lagi kaisi mohabbat

mujhe ek lag hai jaan-e-hazin se

idhar lao zara dast-e-hinai

pakaD den chor dil ka hum yahin se

junun mein is ghazab ki KHak uDai

banaya aasman hum ne zamin se

wahan aashiq-kushi hai ain-iman

unhen kya bahs 'anwar' kufr-o-din se