na mandir mein sanam hote na masjid mein KHuda hota

na mandir meñ sanam hote na masjid meñ ḳhudā hotā

hamīñ se ye tamāsha hai na ham hote to kyā hotā

na aisī manzileñ hotīñ na aisā rāsta hotā

sambhal kar ham zarā chalte to aalam zer-e-pā hotā

ghaTā chhātī bahār aatī tumhārā tazkira hotā

phir us ke ba.ad gul khilte ke zaḳhm-e-dil harā hotā

zamāne ko to bas mashq-e-sitam se lutf lenā hai

nishāne par na ham hote to koī dūsrā hotā

tire shān-e-karam kī laaj rakh lī ġham ke māroñ ne

na hotā ġham to is duniyā meñ har banda ḳhudā hotā

musībat ban ga.e haiñ ab to ye sāñsoñ ke do tinke

jalā thā jab to puurā āshiyāna jal gayā hotā

hameñ to Dūbnā hī thā ye hasrat rah ga.ī dil meñ

kināre aap hote aur safīna Dūbtā hotā

are-o jīte-jī dard-e-judā.ī dene vaale sun

tujhe ham sabr kar lete agar mar ke judā hotā

bulā kar tum ne mahfil meñ hameñ ġhairoñ se uThvāyā

hamīñ ḳhud uTh ga.e hote ishāra kar diyā hotā

tire ahbāb tujh se mil ke phir māyūs lauT aa.e

tujhe 'naushād' kaisī chup lagī kuchh to kahā hotā

na mandir mein sanam hote na masjid mein KHuda hota

hamin se ye tamasha hai na hum hote to kya hota

na aisi manzilen hotin na aisa rasta hota

sambhal kar hum zara chalte to aalam zer-e-pa hota

ghaTa chhati bahaar aati tumhaara tazkira hota

phir us ke baad gul khilte ke zaKHm-e-dil hara hota

zamane ko to bas mashq-e-sitam se lutf lena hai

nishane par na hum hote to koi dusra hota

tere shan-e-karam ki laj rakh li gham ke maron ne

na hota gham to is duniya mein har banda KHuda hota

musibat ban gae hain ab to ye sanson ke do tinke

jala tha jab to pura aashiyana jal gaya hota

hamein to Dubna hi tha ye hasrat rah gai dil mein

kinare aap hote aur safina Dubta hota

are-o jite-ji dard-e-judai dene wale sun

tujhe hum sabr kar lete agar mar ke juda hota

bula kar tum ne mahfil mein hamein ghairon se uThwaya

hamin KHud uTh gae hote ishaara kar diya hota

tere ahbab tujh se mil ke phir mayus lauT aae

tujhe 'naushad' kaisi chup lagi kuchh to kaha hota