na manzilon ka tayyun na koi jada tha

na manziloñ kā ta.ayyun na koī jaada thā

ajab the log safar kā magar irāda thā

unheñ thā zo.am-e-qayādat ki jin ke hisse meñ

na thī nigāh meñ vus.at na dil kushāda thā

vo shahsavār the ghoḌe bhaḌak ga.e un ke

maiñ aaj huuñ sar-e-manzil ki pā-piyāda thā

ġham-e-hayāt ko tum sah nahīñ sake varna

hamārā haal to tum se kahīñ ziyāda thā

masarratoñ ke nagar kī tum ek shahzādī

ġhamoñ ke des kā maiñ bhī to shāhzāda thā

bhalā fareb na khātā to aur kyā kartā

hañsī laboñ pe thī lahja bhī us kā saada thā

maiñ jis ko paikar-e-sidq-o-safā samajhtā thā

patā chalā ki vo rangīn ik labāda thā

na manzilon ka tayyun na koi jada tha

ajab the log safar ka magar irada tha

unhen tha zoam-e-qayaadat ki jin ke hisse mein

na thi nigah mein wusat na dil kushada tha

wo shahsawar the ghoDe bhaDak gae un ke

main aaj hun sar-e-manzil ki pa-piyaada tha

gham-e-hayat ko tum sah nahin sake warna

hamara haal to tum se kahin ziyaada tha

masarraton ke nagar ki tum ek shahzadi

ghamon ke des ka main bhi to shahzada tha

bhala fareb na khata to aur kya karta

hansi labon pe thi lahja bhi us ka sada tha

main jis ko paikar-e-sidq-o-safa samajhta tha

pata chala ki wo rangin ek labaada tha