نہ مطلب گلوں سے نہ گلشن سے ہے

نہ مطلب گلوں سے نہ گلشن سے ہے

محبت ہمیں اپنے دشمن سے ہے

چمن پر نہیں گرتی یہ بجلیاں

عداوت ہمارے نشیمن سے ہے

نگاہیں لڑا کر نظر پھیرنا

یہ عادت تمہاری لڑکپن سے ہے

محبت کی مجبوریاں دیکھیے

ہمیں خواہش رحم دشمن سے ہے

وہ پھر دیکھتے آ کے درد جگر

وہ پھر پوچھتے ترچھی چتون سے ہے

نہ پوچھ ہم نشیں حال جوش جنوں

خرابی عیاں میرے دامن سے ہے

کہیں دل چرائیں نہ آنکھیں تری

مجھے خوف ان دونوں رہزن سے ہے

چمن میں جو خاک آ رہی ہے نظر

یہی یادگار نشیمن سے ہے

عجب رنگ کا جرم ہے آدمی

کہ یارانہ شیخ و برہمن سے ہے