na mera husn-e-zan samjha na andaz-e-suKHan dekha

na merā husn-e-zan samjhā na andāz-e-suḳhan dekhā

agar dekhā to duniyā ne darīda pairahan dekhā

kahīñ husn-e-takallum to kahīñ husn-e-badan dekhā

magar arbāb-e-haq ko is jahāñ meñ ḳhasta-tan dekhā

salīb-e-barg kā har ashk shabnam rū-e-gul par thā

ye manzar tū ne kyā ai sub.h kī pahlī kiran dekhā

badan kī khaal khiñchvā dī nidā-e-qum-bi-iznī ne

anal-haq kī sadā ko zīnat-e-dār-o-rasan dekhā

mire mahbūb kā chehra aur us par dil-nashīñ sahrā

urūs-e-yāsmīñ se yuuñ visāl-e-nastaran dekhā

sulūk-e-be-ruḳhī ne ġhairiyat ko taqviyat baḳhshī

vatan hī meñ vatan vāloñ ko ham ne be-vatan dekhā

milī daad itnī 'anvar' jaise be-māya suḳhanvar ko

ma.āl-e-inkisārī tum ne ahl-e-anjuman dekhā

na mera husn-e-zan samjha na andaz-e-suKHan dekha

agar dekha to duniya ne darida pairahan dekha

kahin husn-e-takallum to kahin husn-e-badan dekha

magar arbab-e-haq ko is jahan mein KHasta-tan dekha

salib-e-barg ka har ashk shabnam ru-e-gul par tha

ye manzar tu ne kya ai subh ki pahli kiran dekha

badan ki khaal khinchwa di nida-e-qum-bi-izni ne

anal-haq ki sada ko zinat-e-dar-o-rasan dekha

mere mahbub ka chehra aur us par dil-nashin sahra

urus-e-yasmin se yun visal-e-nastaran dekha

suluk-e-be-ruKHi ne ghairiyat ko taqwiyat baKHshi

watan hi mein watan walon ko hum ne be-watan dekha

mili dad itni 'anwar' jaise be-maya suKHanwar ko

maal-e-inkisari tum ne ahl-e-anjuman dekha