na mere dil ne na idrak nukta-ju ne kiya

na mere dil ne na idrāk nukta-jū ne kiyā

ḳhudā gavāh hai jo kuchh kiyā vo tū ne kiyā

farefta mujhe aalam ke rang-o-bū ne kiyā

baḌā sitam tire milne kī aarzū ne kiyā

lihāz-e-dāman-e-qātil mire lahū ne kiyā

ḳhayāl-e-shart-e-adab ḳhud rag-e-gulū ne kiyā

ḳhud apnī ziist kā parda thā jab alag ye huā

hijāb duur jamāl-e-ruḳh-e-nikū ne kiyā

bahār aa.ī to kyā nā-shagufta-ḳhātir ko

fasurda aur bhī is mausam-e-numū ne kiyā

harīm-e-quds meñ pahuñchā.egī shahādat ḳhud

ki merī ruuh ko tāhir mire lahū ne kiyā

tumhārī chāragarī ko salām hai merā

ki ek zaḳhm ko sau zaḳhm ik rafū ne kiyā

vo kyūñkar aa ke mile ḳhud ye haal mujh se na pūchh

barā.e-maqsad-e-dil tark aarzū ne kiyā

jo zāhidoñ ne na bātin ko dho ke saaf kiyā

to koī kaam na zāhir kī shust-o-shū ne kiyā

juz apne dil ke na paayā kisī ne us kā nishāñ

hazār aql ko āvāra justujū ne kiyā

baḌī umiid bañdhī be-basoñ ko mahshar meñ

ajab karishma tire tarz-e-guftugū ne kiyā

kahūñgā yaar se maiñ saaf saaf hashr ke din

ki mujh se hijr meñ jo kuchh huā vo tū ne kiyā

bajā rahe na mire aql-o-hosh ai 'betāb'

ġhazab kā mast mujhe pahle hī subū ne kiyā

na mere dil ne na idrak nukta-ju ne kiya

KHuda gawah hai jo kuchh kiya wo tu ne kiya

farefta mujhe aalam ke rang-o-bu ne kiya

baDa sitam tere milne ki aarzu ne kiya

lihaz-e-daman-e-qatil mere lahu ne kiya

KHayal-e-shart-e-adab KHud rag-e-gulu ne kiya

KHud apni zist ka parda tha jab alag ye hua

hijab dur jamal-e-ruKH-e-niku ne kiya

bahaar aai to kya na-shagufta-KHatir ko

fasurda aur bhi is mausam-e-numu ne kiya

harim-e-quds mein pahunchaegi shahadat KHud

ki meri ruh ko tahir mere lahu ne kiya

tumhaari chaaragari ko salam hai mera

ki ek zaKHm ko sau zaKHm ek rafu ne kiya

wo kyunkar aa ke mile KHud ye haal mujh se na puchh

barae-maqsad-e-dil tark aarzu ne kiya

jo zahidon ne na baatin ko dho ke saf kiya

to koi kaam na zahir ki shust-o-shu ne kiya

juz apne dil ke na paya kisi ne us ka nishan

hazar aql ko aawara justuju ne kiya

baDi umid bandhi be-bason ko mahshar mein

ajab karishma tere tarz-e-guftugu ne kiya

kahunga yar se main saf saf hashr ke din

ki mujh se hijr mein jo kuchh hua wo tu ne kiya

baja rahe na mere aql-o-hosh ai 'betab'

ghazab ka mast mujhe pahle hi subu ne kiya