na mere KHwab ko paikar na KHadd-o-Khaal diya

na mere ḳhvāb ko paikar na ḳhadd-o-ḳhāl diyā

bahut diyā to mujhe mauqa-e-visāl diyā

milā na ruuh na dil kā koī hisāb magar

ye kār-e-zīst kisī taur se sambhāl diyā

tamām-umr kī bechainiyoñ se kuchh na huā

mire junūñ ko ḳhirad kah ke us ne Taal diyā

kisī nigāh ne ummīd ko diyā chehra

kisī shabīh ne sab se hasīñ ḳhayāl diyā

mire uyuub kī tasvīr is tarah khīñchī

mire hunar ko pas-e-pusht us ne Daal diyā

ka.ī ḳhayāl jo āvāra-ḳhū the sarkash the

unheñ bhī sher ke sāñche meñ ham ne Dhaal diyā

usī ne sar pe biThāyā thā jis ne aaj 'na.īm'

samajh ke paañv kā kāñTā mujhe nikāl diyā

na mere KHwab ko paikar na KHadd-o-KHal diya

bahut diya to mujhe mauqa-e-visal diya

mila na ruh na dil ka koi hisab magar

ye kar-e-zist kisi taur se sambhaal diya

tamam-umr ki bechainiyon se kuchh na hua

mere junun ko KHirad kah ke us ne Tal diya

kisi nigah ne ummid ko diya chehra

kisi shabih ne sab se hasin KHayal diya

mere uyub ki taswir is tarah khinchi

mere hunar ko pas-e-pusht us ne Dal diya

kai KHayal jo aawara-KHu the sarkash the

unhen bhi sher ke sanche mein hum ne Dhaal diya

usi ne sar pe biThaya tha jis ne aaj 'naim'

samajh ke panw ka kanTa mujhe nikal diya