na meri baat hi samjha na mera muddaa samjha

na merī baat hī samjhā na merā mudda.ā samjhā

sunā qissa magar kyā jaane us zālim ne kyā samjhā

safīna paar us kā ho gayā bahr-e-mohabbat se

har ik mauj-e-talātum-ḳhez ko jo nāḳhudā samjhā

ye alhaḌ-pan hai zālim kā ki hai ye be-ruḳhī us kī

abhī tak mudda.ā merā na vo jān-e-vafā samjhā

na jannat kī tamanna hai na us ko huur kā lālach

ġhalat matlab are nādān tū ne shaiḳh kā samjhā

firāq-e-yār meñ bhī niiñd sī kuchh aa ga.ī mujh ko

shab-e-ġham ye sukūñ pā kar karam be-dard kā samjhā

tabī.at hī to hai zālim ne matlab merī bātoñ kā

bhalā chāhā bhalā samjhā burā chāhā burā samjhā

dobāra kūcha-e-mahbūb meñ jaane kī zahmat kar

payām-e-ishq bittafsīl un ko ai sabā samjhā

jise dekho vo Thukrā kar guzar jaatā hai turbat ko

na duniyā ne shahīdān-e-vafā kā martaba samjhā

haqīqat meñ ye ka.aba hai jahāñ kartā huuñ maiñ sajde

ye terī bhuul hai zāhid jo is ko but-kada samjhā

but-e-kāfir ke mahfil meñ āchānak chaḌh ga.e tevar

hamāre arz-e-maqsad ko ḳhudā jaane vo kyā samjhā

kaTātā hai galā hañs hañs ke us ke ik ishāre par

usī ko be-muravvat ne hamesha bevafā samjhā

hazāroñ qāfile luuTe haiñ jis ne rāh-e-ulfat ke

dil-e-ma.asūm ne 'ahmar' usī ko rahnumā samjhā

na meri baat hi samjha na mera muddaa samjha

suna qissa magar kya jaane us zalim ne kya samjha

safina par us ka ho gaya bahr-e-mohabbat se

har ek mauj-e-talatum-KHez ko jo naKHuda samjha

ye alhaD-pan hai zalim ka ki hai ye be-ruKHi us ki

abhi tak muddaa mera na wo jaan-e-wafa samjha

na jannat ki tamanna hai na us ko hur ka lalach

ghalat matlab are nadan tu ne shaiKH ka samjha

firaq-e-yar mein bhi nind si kuchh aa gai mujh ko

shab-e-gham ye sukun pa kar karam be-dard ka samjha

tabiat hi to hai zalim ne matlab meri baaton ka

bhala chaha bhala samjha bura chaha bura samjha

dobara kucha-e-mahbub mein jaane ki zahmat kar

payam-e-ishq bittafsil un ko ai saba samjha

jise dekho wo Thukra kar guzar jata hai turbat ko

na duniya ne shahidan-e-wafa ka martaba samjha

haqiqat mein ye kaba hai jahan karta hun main sajde

ye teri bhul hai zahid jo is ko but-kada samjha

but-e-kafir ke mahfil mein aachanak chaDh gae tewar

hamare arz-e-maqsad ko KHuda jaane wo kya samjha

kaTata hai gala hans hans ke us ke ek ishaare par

usi ko be-murawwat ne hamesha bewafa samjha

hazaron qafile luTe hain jis ne rah-e-ulfat ke

dil-e-masum ne 'ahmar' usi ko rahnuma samjha