na mil saka kahin DhunDe se bhi nishan mera

na mil sakā kahīñ DhūñDe se bhī nishān mirā

tamām raat bhaTaktā rahā kisān mirā

maiñ ghar basā ke samundar ke biich soyā thā

uThā to aag kī lapToñ meñ thā makān mirā

junūñ na kahiye ise ḳhud-aziyyatī kahiye

badan tamām huā hai lahū-luhān mirā

havā.eñ gard kī sūrat uḌā rahī haiñ mujhe

na ab zamīñ hī mirī hai na āsmān mirā

dhamak kahīñ ho laraztī haiñ khiḌkiyāñ merī

ghaTā kahīñ ho Tapaktā hai sā.ebān mirā

musībatoñ ke bhañvar meñ pukārte haiñ mujhe

ajiib dost haiñ lete haiñ imtihān mirā

kise ḳhutūt likhūñ hāl-e-dil sunā.ūñ kise

na koī harf-e-shanāsā na ham-zabān mirā

na mil saka kahin DhunDe se bhi nishan mera

tamam raat bhaTakta raha kisan mera

main ghar basa ke samundar ke bich soya tha

uTha to aag ki lapTon mein tha makan mera

junun na kahiye ise KHud-aziyyati kahiye

badan tamam hua hai lahu-luhan mera

hawaen gard ki surat uDa rahi hain mujhe

na ab zamin hi meri hai na aasman mera

dhamak kahin ho larazti hain khiDkiyan meri

ghaTa kahin ho Tapakta hai saeban mera

musibaton ke bhanwar mein pukarte hain mujhe

ajib dost hain lete hain imtihan mera

kise KHutut likhun haal-e-dil sunaun kise

na koi harf-e-shanasa na ham-zaban mera