na mohabbat na mohabbat ki ada hai yaro

na mohabbat na mohabbat kī adā hai yaaro

na malāmat na shikāyat na jafā hai yaaro

ġham kī talḳhī hai magar kitnā maza hai yaaro

ālam-e-shauq kā aalam hī judā hai yaaro

raunaq-e-bazm bhī afsurda chalī saath hī saath

kaun bā-dīda-e-nam uTh ke chalā hai yaaro

koī marham na mudāvā na kahīñ sidq-o-safā

ye bhī ik mere zamāne kī adā hai yaaro

mere hālāt samajh leñge samajhne vaale

ye ḳhamoshī bhī takallum kī adā hai yaaro

niyyateñ badlī haiñ rahbar ne tasāhul bartā

qāfila jab bhī zarā ban ke chalā hai yaaro

dil meñ zaḳhmoñ kī dukhan hoñToñ pe aahoñ kā dhuāñ

zindagī bhar kī vafāoñ kā sila hai yaaro

jitne ehsān haiñ mujh par nahīñ bhūlūñgā kabhī

choT jab khaa.ī tumheñ yaad kiyā hai yaaro

mirī āvāz nahīñ sāz-e-shikasta kī sadā

koī samjhe to yahī bāñg-e-darā hai yaaro

maslahat vaqt kī māyūs hī lauTī ham se

jo bhī kahnā thā sar-e-dār kahā hai yaaro

ab na armān na hasrat na alam hai na ḳhushī

ham se duniyā ne hameñ chhīn liyā hai yaaro

mash.al-e-naqd-o-nazar le ke parakh lo sab ko

kaun aġhrāz kī chaukhaT pe jhukā hai yaaro

maiñ ne nafrat ke sharāroñ kī lapaT paa.ī hai

milne vaalā jo koī hañs ke milā hai yaaro

ik vafā-kesh mohabbat kā parastār 'qamar'

ġham ke sahrāoñ meñ ḳhāmosh khaḌā hai yaaro

na mohabbat na mohabbat ki ada hai yaro

na malamat na shikayat na jafa hai yaro

gham ki talKHi hai magar kitna maza hai yaro

aalam-e-shauq ka aalam hi juda hai yaro

raunaq-e-bazm bhi afsurda chali sath hi sath

kaun ba-dida-e-nam uTh ke chala hai yaro

koi marham na mudawa na kahin sidq-o-safa

ye bhi ek mere zamane ki ada hai yaro

mere haalat samajh lenge samajhne wale

ye KHamoshi bhi takallum ki ada hai yaro

niyyaten badli hain rahbar ne tasahul barta

qafila jab bhi zara ban ke chala hai yaro

dil mein zaKHmon ki dukhan honTon pe aahon ka dhuan

zindagi bhar ki wafaon ka sila hai yaro

jitne ehsan hain mujh par nahin bhulunga kabhi

choT jab khai tumhein yaad kiya hai yaro

meri aawaz nahin saz-e-shikasta ki sada

koi samjhe to yahi bang-e-dara hai yaro

maslahat waqt ki mayus hi lauTi hum se

jo bhi kahna tha sar-e-dar kaha hai yaro

ab na arman na hasrat na alam hai na KHushi

hum se duniya ne hamein chhin liya hai yaro

mashal-e-naqd-o-nazar le ke parakh lo sab ko

kaun aghraaz ki chaukhaT pe jhuka hai yaro

main ne nafrat ke shararon ki lapaT pai hai

milne wala jo koi hans ke mila hai yaro

ek wafa-kesh mohabbat ka parastar 'qamar'

gham ke sahraon mein KHamosh khaDa hai yaro