na mohtasib ki na hur-o-jinan ki baat karo

na mohtasib kī na hūr-o-jināñ kī baat karo

mai-e-kuhan kī nigār-e-javāñ kī baat karo

kisī kī tābish-e-ruḳhsār kā kaho qissa

kisī ke gesū-e-ambar-fishāñ kī baat karo

ziyā hai shāhid-o-sham.a-o-sharāb se us kī

faroġh-e-mahfil-e-rūhāniyāñ kī baat karo

jo mudda.ā ho kisī qibla-e-murād kā zikr

to āstāna-e-pīr-e-muġhāñ kī baat karo

nahīñ huā jo tulūa āftāb to filhāl

qamar kī baat karo kahkashāñ kī baat karo

rahegā mashġhala-e-yād-e-raftgāñ kab tak

guzar rahā hai jo us kārvāñ kī baat karo

ye qaid-o-said ke andesha-hā-e-be-jā kyā

chaman kī fikr karo āshiyāñ kī baat karo

yahī jahān hai hañgāma-zār-e-sūd-o-ziyāñ

isī ke suud isī ke ziyāñ kī baat karo

ab is chaman meñ na sayyād hai na gulchīñ hai

karo to ab sitam-e-bāġhbāñ kī baat karo

ḳhudā ke zikr kā mauqa nahīñ yahāñ 'sālik'

dayār-e-hind meñ husn-e-butāñ kī baat karo

na mohtasib ki na hur-o-jinan ki baat karo

mai-e-kuhan ki nigar-e-jawan ki baat karo

kisi ki tabish-e-ruKHsar ka kaho qissa

kisi ke gesu-e-ambar-fishan ki baat karo

ziya hai shahid-o-shama-o-sharab se us ki

farogh-e-mahfil-e-ruhaniyan ki baat karo

jo muddaa ho kisi qibla-e-murad ka zikr

to aastana-e-pir-e-mughan ki baat karo

nahin hua jo tulua aaftab to filhaal

qamar ki baat karo kahkashan ki baat karo

rahega mashghala-e-yaad-e-raftgan kab tak

guzar raha hai jo us karwan ki baat karo

ye qaid-o-said ke andesha-ha-e-be-ja kya

chaman ki fikr karo aashiyan ki baat karo

yahi jahan hai hangama-zar-e-sud-o-ziyan

isi ke sud isi ke ziyan ki baat karo

ab is chaman mein na sayyaad hai na gulchin hai

karo to ab sitam-e-baghban ki baat karo

KHuda ke zikr ka mauqa nahin yahan 'salik'

dayar-e-hind mein husn-e-butan ki baat karo