نہ مجھے روک سکا آپ کا درباں کوئی

نہ مجھے روک سکا آپ کا درباں کوئی

کھینچتا تھا کوئی دامن تو گریباں کوئی

سننے والا نہیں جب حال پریشاں کوئی

تو کہے کس لئے اپنا غم پنہاں کوئی

حسن پر اپنے سر بزم ہے نازاں کوئی

صورت آئنہ ہے دیکھ کے حیراں کوئی

اتش حسن کا رخ پر یہ دھواں ہے جس کو

خط سمجھتا ہے کوئی زلف پریشاں کوئی

شام سے یہ جو سنورتے ہیں تمہارے گیسو

جمع خاطر کوئی ہوگا تو پریشاں کوئی

دیکھ کر عالم وحشت میں مری حیرانی

کوئی خنداں ہے تو انگشت بدنداں کوئی

سوئے در آج یہ کیوں آنکھ لگی ہے صابرؔ

منتظر کس کے ہو کیا آئے گا مہماں کوئی