na paya khoj barson naqsh-e-pa-e-raftagan DhunDhe

na paayā khoj barsoñ naqsh-e-pā-e-raftagāñ DhūñDhe

na ho mumkin patā jin kā unheñ koī kahāñ DhūñDhe

talāsh is tarah bazm-e-aish meñ hai be-nishānoñ kī

koī kapḌe meñ jaise zaḳhm-e-sozan kā nishāñ DhūñDhe

ham us ke zikr hī se ḳhush kiyā karte haiñ dil apnā

sahārā jaise tinke kā ġharīq-e-nīm-jāñ DhūñDhe

kidhar ko ruuTh kar jaatā rahā ahd-e-shabāb apnā

na paayā is musāfir ko hazāroñ kārvāñ DhūñDhe

uThānā ho subuk aadam pe jab bār-e-amānat kā

kahāñ se phir koī is ke liye bār-e-girāñ DhūñDhe

girah sāñsoñ meñ Daalī hai 'havas' ifrāt-e-girya ne

na āh-e-nā-tavāñ aane ko lab tak nardbāñ DhūñDhe

na paya khoj barson naqsh-e-pa-e-raftagan DhunDhe

na ho mumkin pata jin ka unhen koi kahan DhunDhe

talash is tarah bazm-e-aish mein hai be-nishanon ki

koi kapDe mein jaise zaKHm-e-sozan ka nishan DhunDhe

hum us ke zikr hi se KHush kiya karte hain dil apna

sahaara jaise tinke ka ghariq-e-nim-jaan DhunDhe

kidhar ko ruTh kar jata raha ahd-e-shabab apna

na paya is musafir ko hazaron karwan DhunDhe

uThana ho subuk aadam pe jab bar-e-amanat ka

kahan se phir koi is ke liye bar-e-giran DhunDhe

girah sanson mein Dali hai 'hawas' ifraat-e-girya ne

na aah-e-na-tawan aane ko lab tak nardban DhunDhe