نہ پیش ظلم کسی طور خم کیا جائے

نہ پیش ظلم کسی طور خم کیا جائے

ہزار بار بھی گر سر قلم کیا جائے

بہت سے لوگ تو ہر وقت اس فراق میں ہیں

کسی طرح مری ہمت کو کم کیا جائے

وہ سوچتا ہے فقط میں ہی میں رہوں ہر سو

میں چاہتا ہوں کہ اس میں کو ہم کیا جائے

وہ جن کی کوئی فضیلت کہیں نہیں ملتی

وہ کہہ رہے ہیں ہمیں محترم کیا جائے

سکون قلب انہیں خواہشوں نے چھینا ہے

اب ان سے کہہ دو کہ مجھ پر کرم کیا جائے

میں زخم کھا کے مسلسل اسی تلاش میں ہوں

کسی بہانے اب آنکھوں کو نم کیا جائے

جو ہو نہ پائے وظیفہ بھی کارگر کوئی

تو خود پہ میرؔ کے شعروں کو دم کیا جائے