na pesh-e-zulm kisi taur KHam kiya jae

na pesh-e-zulm kisī taur ḳham kiyā jaa.e

hazār baar bhī gar sar qalam kiyā jaa.e

bahut se log to har vaqt is firāq meñ haiñ

kisī tarah mirī himmat ko kam kiyā jaa.e

vo sochtā hai faqat maiñ hī maiñ rahūñ har-sū

maiñ chāhtā huuñ ki is maiñ ko ham kiyā jaa.e

vo jin kī koī fazīlat kahīñ nahīñ miltī

vo kah rahe haiñ hameñ mohtaram kiyā jaa.e

sukūn-e-qalb inhīñ ḳhvāhishoñ ne chhīnā hai

ab in se kah do ki mujh par karam kiyā jaa.e

maiñ zaḳhm khā ke musalsal isī talāsh meñ huuñ

kisī bahāne ab āñkhoñ ko nam kiyā jaa.e

jo ho na paa.e vazīfa bhī kārgar koī

to ḳhud pe 'mīr' ke sheroñ ko dam kiyā jaa.e

na pesh-e-zulm kisi taur KHam kiya jae

hazar bar bhi gar sar qalam kiya jae

bahut se log to har waqt is firaq mein hain

kisi tarah meri himmat ko kam kiya jae

wo sochta hai faqat main hi main rahun har-su

main chahta hun ki is main ko hum kiya jae

wo jin ki koi fazilat kahin nahin milti

wo kah rahe hain hamein mohtaram kiya jae

sukun-e-qalb inhin KHwahishon ne chhina hai

ab in se kah do ki mujh par karam kiya jae

main zaKHm kha ke musalsal isi talash mein hun

kisi bahane ab aankhon ko nam kiya jae

jo ho na pae wazifa bhi kargar koi

to KHud pe 'mir' ke sheron ko dam kiya jae