na puchh ai ham-nafas afsana-e-ranj-o-mehan mera

na pūchh ai ham-nafas afsāna-e-rañj-o-mehan merā

na hai bas meñ zabāñ merī na qaabū meñ dahan merā

shamīm-e-zulf ne mahkā diyā dil kā har ik gosha

jo bikhrīñ yaar kī zulfeñ banā pallū ḳhutan merā

satā le jitnā jī chāhe magar itnā samajh rakhnā

rasā hogā kabhī to naala ai charḳh-e-kuhan merā

na dāman hī salāmat hai na jeb-o-āstīñ baaqī

huā hai nazr-e-ḳhār-e-dasht saarā pairahan merā

hare phir kar diye zaḳhm-e-jigar abr-e-bahārāñ ne

huā shādāb do chhīñToñ meñ ye ujḌā chaman merā

vo kahte haiñ kaho jo kuchh tumheñ kahnā ho ai 'kaifī'

magar tāqat kahāñ se laa.e kahne kī dahan merā

na puchh ai ham-nafas afsana-e-ranj-o-mehan mera

na hai bas mein zaban meri na qabu mein dahan mera

shamim-e-zulf ne mahka diya dil ka har ek gosha

jo bikhrin yar ki zulfen bana pallu KHutan mera

sata le jitna ji chahe magar itna samajh rakhna

rasa hoga kabhi to nala ai charKH-e-kuhan mera

na daman hi salamat hai na jeb-o-astin baqi

hua hai nazr-e-KHar-e-dasht sara pairahan mera

hare phir kar diye zaKHm-e-jigar abr-e-bahaaran ne

hua shadab do chhinTon mein ye ujDa chaman mera

wo kahte hain kaho jo kuchh tumhein kahna ho ai 'kaifi'

magar taqat kahan se lae kahne ki dahan mera