نہ پوچھ اے نور شمع حسن پروانوں پہ کیا گزری

نہ پوچھ اے نور شمع حسن پروانوں پہ کیا گزری

ہوا شعلہ فشاں جو تو تو دیوانوں پہ کیا گزری

بتائیں اہل دل دنیا کے ایمانوں پہ کیا گزری

مساجد پر پڑیں چوٹیں تو بت خانوں پہ کیا گزری

جلانا برق کا تو شغل تھا گر گھر جلا ڈالے

وہ کیوں یہ سوچتی دنیا کے خس خانوں پہ کیا گزری

بتاؤ تو ذرا انسانیت کے نام لیواؤ

کہ خود انسان کے ہاتھوں سے انسانوں پہ کیا گزری

نگاہوں کا وہ ہلکا سا تصادم ہے معاذ اللہ

پھر اس کے بعد کیا کہئے کہ دیوانوں پہ کیا گزری

مسلم تیری تابانی بجا اے شمع ضو تیری

مگر یہ بھی کبھی دیکھا کہ پروانوں پہ کیا گزری

در زنداں پہ وہ مغموم و آزردہ سے بیٹھے ہیں

الٰہی خیر ہو آج ان کے دیوانوں پہ کیا گزری

دعائیں میکشوں کی پھرتی ہیں بھٹکی ہوئی حیرتؔ

یہ کیوں باب اثر ہے بند مے خانوں پہ کیا گزری