na puchh ishq ke sadme uThae hain kya kya

na pūchh ishq ke sadme uThā.e haiñ kyā kyā

shab-e-firāq meñ ham tilmilā.e haiñ kyā kyā

zarā tū dekh to sannā-e-dast-e-qudrat ne

tilism-e-ḳhāk se naqshe uThā.e haiñ kyā kyā

maiñ us ke husn ke aalam kī kyā karūñ tārīf

na pūchh mujh se ki aalam dikhā.e haiñ kyā kyā

zarā to dekh tū ghar se nikal ke ai be-mehr

ki dekhne ko tire log aa.e haiñ kyā kyā

koī paTaktā hai sar koī jaan khotā hai

tire ḳhirām ne fitne uThā.e haiñ kyā kyā

zarā tū aan ke āb-e-ravāñ kī sair to kar

hamārī chashm ne chashme bahā.e haiñ kyā kyā

nigāh-e-ġhaur se Tuk 'mus.hafī' kī jānib dekh

jigar pe us ne tire zaḳhm khaa.e haiñ kyā kyā

na puchh ishq ke sadme uThae hain kya kya

shab-e-firaq mein hum tilmilae hain kya kya

zara tu dekh to sanna-e-dast-e-qudrat ne

tilism-e-KHak se naqshe uThae hain kya kya

main us ke husn ke aalam ki kya karun tarif

na puchh mujh se ki aalam dikhae hain kya kya

zara to dekh tu ghar se nikal ke ai be-mehr

ki dekhne ko tere log aae hain kya kya

koi paTakta hai sar koi jaan khota hai

tere KHiram ne fitne uThae hain kya kya

zara tu aan ke aab-e-rawan ki sair to kar

hamari chashm ne chashme bahae hain kya kya

nigah-e-ghaur se Tuk 'mushafi' ki jaanib dekh

jigar pe us ne tere zaKHm khae hain kya kya