na puchh marg-e-shanasai ka sabab kya hai

na pūchh marg-e-shanāsā.ī kā sabab kyā hai

kabhī hameñ thā ta.alluq sabhoñ se ab kyā hai

jahāñ sukūt musallat hai dam-ba-ḳhud hai hayāt

vahīñ se shor-e-qayāmat uThe ajab kyā hai

jo zehn hī meñ siyāhī uñDel de sūraj

to phir tamīz kise sub.h kyā hai shab kyā hai

janm diyā hai dukhoñ ne ġhamoñ ne paalā hai

ḳhudā se pūchhiye merā hasab-nasab kyā hai

vo zahr-e-ḳhand jo ghole haiñ chashm o lab ne tire

tujhe ḳhushī ho to pūchheñ ki zer-e-lab kyā hai

uThe haiñ haath to apne karam kī laaj bachā

vagarna merī duā kyā mirī talab kyā hai

na puchh marg-e-shanasai ka sabab kya hai

kabhi hamein tha talluq sabhon se ab kya hai

jahan sukut musallat hai dam-ba-KHud hai hayat

wahin se shor-e-qayamat uThe ajab kya hai

jo zehn hi mein siyahi unDel de suraj

to phir tamiz kise subh kya hai shab kya hai

janm diya hai dukhon ne ghamon ne pala hai

KHuda se puchhiye mera hasab-nasab kya hai

wo zahr-e-KHand jo ghole hain chashm o lab ne tere

tujhe KHushi ho to puchhen ki zer-e-lab kya hai

uThe hain hath to apne karam ki laj bacha

wagarna meri dua kya meri talab kya hai