na puchh rah-e-talab mein kidhar se guzra hun

na pūchh rāh-e-talab meñ kidhar se guzrā huuñ

tire hī paas se guzrā jidhar se guzrā huuñ

ḳhudā gavāh ki dil meñ ḳhulūs-e-ġham le kar

ba-ehtirām shab-e-be-sahar se guzrā huuñ

tirī nazar ko bhī ab tak ḳhabar nahīñ ai dost

is ehtiyāt se terī nazar se guzrā huuñ

tire ḳhayāl ko bhī Thes lag na jaa.e kahīñ

bahut sañbhal ke ġham-e-mo'tabar se guzrā huuñ

kabhī kabhī to ik aisā maqām aayā hai

maiñ husn ban ke ḳhud apnī nazar se guzrā huuñ

bas is qadar hai mirī sharh-e-sarguzasht-e-hayāt

kisī kī ik nigah-e-muḳhtasar se guzrā huuñ

kise batā.ūñ kyā ai 'ārzū' maiñ kitnī baar

ḳhud un ke zehn meñ un kī nazar se guzrā huuñ

na puchh rah-e-talab mein kidhar se guzra hun

tere hi pas se guzra jidhar se guzra hun

KHuda gawah ki dil mein KHulus-e-gham le kar

ba-ehtiram shab-e-be-sahar se guzra hun

teri nazar ko bhi ab tak KHabar nahin ai dost

is ehtiyat se teri nazar se guzra hun

tere KHayal ko bhi Thes lag na jae kahin

bahut sanbhal ke gham-e-mo'tabar se guzra hun

kabhi kabhi to ek aisa maqam aaya hai

main husn ban ke KHud apni nazar se guzra hun

bas is qadar hai meri sharh-e-sarguzasht-e-hayat

kisi ki ek nigah-e-muKHtasar se guzra hun

kise bataun kya ai 'arzu' main kitni bar

KHud un ke zehn mein un ki nazar se guzra hun