na puchho dil ko le kar muddaa kya

na pūchho dil ko le kar mudda.ā kyā

taqāzā-e-nigāh-e-nāz thā kyā

nahīñ fitna-badāmāñ har adā kyā

nigāh-e-nāz hī hai fitna-e-zā kyā

kisī ke vasl se behtar hai furqat

agar hasrat nahīñ to phir rahā kyā

ayaañ hai merī bad-halī se sab kuchh

batā.ūñ aur qismat kā likhā kyā

tumhāre saath lutf-e-zindagī thā

jiyā koī agar yuuñ to jiyā kyā

bahut machle the dil lene kī ḳhātir

na jaane merā dil le kar kiyā kyā

hue 'jauhar' sabhī apne parā.e

sukūn-e-jān-o-dil kyā dilrubā kyā

na puchho dil ko le kar muddaa kya

taqaza-e-nigah-e-naz tha kya

nahin fitna-badaman har ada kya

nigah-e-naz hi hai fitna-e-za kya

kisi ke wasl se behtar hai furqat

agar hasrat nahin to phir raha kya

ayan hai meri bad-hali se sab kuchh

bataun aur qismat ka likha kya

tumhaare sath lutf-e-zindagi tha

jiya koi agar yun to jiya kya

bahut machle the dil lene ki KHatir

na jaane mera dil le kar kiya kya

hue 'jauhar' sabhi apne parae

sukun-e-jaan-o-dil kya dilruba kya