نہ پوچھو دل کو لے کر مدعا کیا

نہ پوچھو دل کو لے کر مدعا کیا

تقاضائے نگاہ ناز تھا کیا

نہیں فتنہ بداماں ہر ادا کیا

نگاہ ناز ہی ہے فتنہ زا کیا

کسی کے وصل سے بہتر ہے فرقت

اگر حسرت نہیں تو پھر رہا کیا

عیاں ہے میری بدحالی سے سب کچھ

بتاؤں اور قسمت کا لکھا کیا

تمہارے ساتھ لطف زندگی تھا

جیا کوئی اگر یوں تو جیا کیا

بہت مچلے تھے دل لینے کی خاطر

نہ جانے میرا دل لے کر کیا کیا

ہوئے جوہرؔ سبھی اپنے پرائے

سکون جان و دل کیا دل ربا کیا