نہ پوچھو کیسے گزری شب ہماری ہجر جاناں میں

نہ پوچھو کیسے گزری شب ہماری ہجر جاناں میں

رہی ہے دل کو شب بھر بے قراری ہجر جاناں میں

جدا کچھ یوں ہوا تھا وہ کہ خوشیاں لے گیا ساری

سو اب کیا ہے فقط ہے آہ و زاری ہجر جاناں میں

دوا مرہم تو کیا یہ وقت سے بھی بھر نہیں سکتا

ملا ہے ہم کو ایسا زخم کاری ہجر جاناں میں

فقط اک بات ہے کن کی مرے مولیٰ اگر کہہ دے

ترے در پر کھڑا ہے اک بھکاری ہجر جاناں میں

کبھی شدت سے یاد آئی لپٹ کر رو لیے خود سے

گزاری ہم نے یوں ہی عمر ساری ہجر جاناں میں