na puchho kaise guzri shab hamari hijr-e-jaanan mein

na pūchho kaise guzrī shab hamārī hijr-e-jānāñ meñ

rahī hai dil ko shab-bhar be-qarārī hijr-e-jānāñ meñ

judā kuchh yuuñ huā thā vo ki ḳhushiyāñ le gayā saarī

so ab kyā hai faqat hai āh-o-zārī hijr-e-jānāñ meñ

davā marham to kyā ye vaqt se bhī bhar nahīñ saktā

milā hai ham ko aisā zaḳhm-e-kārī hijr-e-jānāñ meñ

faqat ik baat hai kun kī mire maulā agar kah de

tire dar par khaḌā hai ik bhikārī hijr-e-jānāñ meñ

kabhī shiddat se yaad aa.ī lipaT kar ro liye ḳhud se

guzārī ham ne yuuñ hī 'umr saarī hijr-e-jānāñ meñ

na puchho kaise guzri shab hamari hijr-e-jaanan mein

rahi hai dil ko shab-bhar be-qarari hijr-e-jaanan mein

juda kuchh yun hua tha wo ki KHushiyan le gaya sari

so ab kya hai faqat hai aah-o-zari hijr-e-jaanan mein

dawa marham to kya ye waqt se bhi bhar nahin sakta

mila hai hum ko aisa zaKHm-e-kari hijr-e-jaanan mein

faqat ek baat hai kun ki mere maula agar kah de

tere dar par khaDa hai ek bhikari hijr-e-jaanan mein

kabhi shiddat se yaad aai lipaT kar ro liye KHud se

guzari hum ne yun hi 'umr sari hijr-e-jaanan mein