na puchho saghar-o-mai aur mai-KHanon pe kya guzri

na pūchho sāġhar-o-mai aur mai-ḳhānoñ pe kyā guzrī

na ho saaqī to ye pūchho ki mastānoñ pe kyā guzrī

na kah mutrib mirī chup se tire gānoñ pe kyā guzrī

zarā pūchh apnī tānoñ se mire kānoñ pe kyā guzrī

junūñ kahiye jise ik mauj-e-bahr-e-lā-shu.ūrī hai

koī farzāna kyā samjhe ki dīvānoñ pe kyā guzrī

maiñ tūfānoñ se laḌ-bhiḌ kar salāmat jab nikal aaya

to ye merī balā jaane ki tūfānoñ pe kyā guzrī

vahī vahshat hai mere baad bhī jo mujh se pahle thī

guzarnā thī jo guzrī mujh pe vīrānoñ pe kyā guzrī

jalānā thā mujhe aur un ko jal kar ḳhaak ho jaanā

ab is kī fikr kyā hai sham.a parvānoñ pe kyā guzrī

agar patthar ke dil hotā to sunte us kā afsāna

ki ahd-e-khusravī ke baad aivānoñ pe kyā guzrī

maiñ un kī bazm meñ chhup kar gayā chhup kar nikal aaya

ḳhudā jaane ki mere baad darbānoñ pe kyā guzrī

samajh vaale samajhte haiñ ki un par kyā guzartī hai

vo nādāñ hai jo ye pūchhe ki nā-dānoñ pe kyā guzrī

tire dast-o-zabāñ kī larzisheñ mā'lūm haiñ zāhid

magar ye to batā tasbīh ke dānoñ pe kyā guzrī

huī vābastagī jab ādam-o-havvā kī jannat meñ

na pūchho muntazir hūroñ ke armānoñ pe kyā guzrī

jab insānoñ ko ashraf kā milā tamġha to ye kahiye

pahāḌoñ aur daraḳhtoñ aur haivānoñ pe kyā guzrī

na puchho saghar-o-mai aur mai-KHanon pe kya guzri

na ho saqi to ye puchho ki mastanon pe kya guzri

na kah mutrib meri chup se tere ganon pe kya guzri

zara puchh apni tanon se mere kanon pe kya guzri

junun kahiye jise ek mauj-e-bahr-e-la-shuuri hai

koi farzana kya samjhe ki diwanon pe kya guzri

main tufanon se laD-bhiD kar salamat jab nikal aaya

to ye meri bala jaane ki tufanon pe kya guzri

wahi wahshat hai mere baad bhi jo mujh se pahle thi

guzarna thi jo guzri mujh pe viranon pe kya guzri

jalana tha mujhe aur un ko jal kar KHak ho jaana

ab is ki fikr kya hai shama parwanon pe kya guzri

agar patthar ke dil hota to sunte us ka afsana

ki ahd-e-khusrawi ke baad aiwanon pe kya guzri

main un ki bazm mein chhup kar gaya chhup kar nikal aaya

KHuda jaane ki mere baad darbanon pe kya guzri

samajh wale samajhte hain ki un par kya guzarti hai

wo nadan hai jo ye puchhe ki na-danon pe kya guzri

tere dast-o-zaban ki larzishen ma'lum hain zahid

magar ye to bata tasbih ke danon pe kya guzri

hui wabastagi jab aadam-o-hawwa ki jannat mein

na puchho muntazir huron ke armanon pe kya guzri

jab insanon ko ashraf ka mila tamgha to ye kahiye

pahaDon aur daraKHton aur haiwanon pe kya guzri