نہ قدر شعر نہ قدر ہنر ہے کیا کہئے

نہ قدر شعر نہ قدر ہنر ہے کیا کہئے

یہ شاعری ہے کہ خون جگر ہے کیا کہئے

ہزار شور ملامت ہزار رسوائی

مگر عزیز تری رہ گزر ہے کیا کہئے

امید وصل میں کچھ اور جی لئے ہوتے

یہ زندگی بھی مگر مختصر ہے کیا کہئے

نہ کوئی صبح تمنا نہ صبح وصل کوئی

سحر ہنوز فریب سحر ہے کیا کہئے

بہت حسین فضائے حیات ہے لیکن

فضا ہے اور غم بال و پر ہے کیا کہئے

بدل رہا ہے دلوں کو بھی دور سرمایہ

نگاہ ناز بھی نا معتبر ہے کیا کہئے

پیامؔ جیتے ہیں ہم باوجود ناکامی

ہوس حیات کی اور کس قدر ہے کیا کہئے