na qadr-e-sher na qadr-e-hunar hai kya kahiye

na qadr-e-sher na qadr-e-hunar hai kyā kahiye

ye shā.erī hai ki ḳhūn-e-jigar hai kyā kahiye

hazār shor-e-malāmat hazār rusvā.ī

magar aziiz tirī rahguzar hai kyā kahiye

umīd-e-vasl meñ kuchh aur jī liye hote

ye zindagī bhī magar muḳhtasar hai kyā kahiye

na koī sub.h-e-tamannā na sub.h-e-vasl koī

sahar hanūz fareb-e-sahar hai kyā kahiye

bahut hasīn fazā-e-hayāt hai lekin

fazā hai aur ġham-e-bāl-o-par hai kyā kahiye

badal rahā hai diloñ ko bhī daur-e-sarmāya

nigāh-e-nāz bhī nā-mo'tabar hai kyā kahiye

'payām' jiite haiñ ham bāvajūd-e-nākāmī

havas hayāt kī aur kis qadar hai kyā kahiye

na qadr-e-sher na qadr-e-hunar hai kya kahiye

ye shaeri hai ki KHun-e-jigar hai kya kahiye

hazar shor-e-malamat hazar ruswai

magar aziz teri rahguzar hai kya kahiye

umid-e-wasl mein kuchh aur ji liye hote

ye zindagi bhi magar muKHtasar hai kya kahiye

na koi subh-e-tamanna na subh-e-wasl koi

sahar hanuz fareb-e-sahar hai kya kahiye

bahut hasin faza-e-hayat hai lekin

faza hai aur gham-e-baal-o-par hai kya kahiye

badal raha hai dilon ko bhi daur-e-sarmaya

nigah-e-naz bhi na-mo'tabar hai kya kahiye

'payam' jite hain hum bawajud-e-nakaami

hawas hayat ki aur kis qadar hai kya kahiye