na raha shikwa-e-jafa na raha

na rahā shikva-e-jafā na rahā

ho ke dushman bhī āshnā na rahā

bevafā jān-o-māl be-sarfa

kyā rahā jab ki dil-rubā na rahā

sabhī aġhyār haiñ sabhī āshiq

e'timād us kā ek jā na rahā

ḳhaak thā jis chaman kī rañg-e-iram

patte patte kā vaañ patā na rahā

vasl meñ kyā visāl mushkil thā

yaad par roz hijr kā na rahā

ḳhat mirā vaañ gayā gayā na gayā

sar-e-qāsid rahā rahā na rahā

dil meñ rahtā hai kaun ġham ke sivā

koī is ghar meñ dūsrā na rahā

ġhair aur shikva-e-jafā tum se

haa.e maiñ qābul-e-vafā na rahā

kyā huā kyuuñ 'qalaq' ko rote ho

koī is dahr meñ sadā na rahā

na raha shikwa-e-jafa na raha

ho ke dushman bhi aashna na raha

bewafa jaan-o-mal be-sarfa

kya raha jab ki dil-ruba na raha

sabhi aghyar hain sabhi aashiq

e'timad us ka ek ja na raha

KHak tha jis chaman ki rang-e-iram

patte patte ka wan pata na raha

wasl mein kya visal mushkil tha

yaad par roz hijr ka na raha

KHat mera wan gaya gaya na gaya

sar-e-qasid raha raha na raha

dil mein rahta hai kaun gham ke siwa

koi is ghar mein dusra na raha

ghair aur shikwa-e-jafa tum se

hae main qabul-e-wafa na raha

kya hua kyun 'qalaq' ko rote ho

koi is dahr mein sada na raha