نہ رو اے دل ترے رونے سے کیوں ہو مہرباں کوئی

نہ رو اے دل ترے رونے سے کیوں ہو مہرباں کوئی

یہاں نہ ہم زباں کوئی نہ تیرا راز داں کوئی

ریا کاری سے بچنے کے لئے ہو آستاں ایسا

جہاں ماتھے پہ قشقہ ہو نہ سجدہ کا نشان کوئی

گلوں کا رنگ پیلا ہے خزاں کا دور دورہ ہے

چمن کی آبیاری کو نہیں ہے باغباں کوئی

مکاں کی اس قدر عجلت تری دنیا میں اے مالک

کہ بعد از مرگ بھی ملتا نہیں خالی مکاں کوئی

کہاں کی رہبری کیسی قیادت کیا قیادت میں

سحرؔ پہنچا بھی ہے منزل پہ اب تک کارواں کوئی