na roab-e-jah mein aa kar kisi se guftugu ki

na ro.ab-e-jāh meñ aa kar kisī se guftugū kī

jo ham ne kī to phir apnī ḳhushī se guftugū kī

zarūrī ho gayā thā shahr-e-dil barbād karnā

so kar ke hausla ġhārat-garī se guftugū kī

adab kī mahfileñ khīñcheñ haiñ dil lekin vahāñ to

sabhī the be-adab so be-dilī se guftugū kī

fasāne be-qarārī ke sunātī aur kis ko

ye terā ġham thā tere hijr hī se guftugū kī

amīr-e-saltanat thā shā.iba tak ho na paayā

ki us ne yuuñ kamāl-e-ājizī se guftugū kī

qazā se maañg ke mohlat phir ham ne pal-do-pal kī

ye pahlī baar thā jab zindagī se guftugū kī

maiñ lahje ke fusūñ meñ gum thī so ye tak na samjhī

kyoñ us ne ab ke is vāraftagī se guftugū kī

na raas aa.iiñ jo ham ko mahfileñ shor-o-shaġhab kī

to kunj-e-gul meñ jā kar ḳhāmushī se guftugū kī

dikhā.ī tuur par maiñ ne kuchh aise hoshiyārī

ki āñkheñ band kar ke raushnī se guftugū kī

raqam ik dāstān-e-sabr hone ko thī lekin

samundar ne ḳhud aa kar tishnagī se guftugū kī

'tabassum' kuchh bharam rakhtīñ ta'āruf hone detīñ

yuuñ be-ḳhud ho ke kyoñ us ajnabī se guftugū kī

na roab-e-jah mein aa kar kisi se guftugu ki

jo hum ne ki to phir apni KHushi se guftugu ki

zaruri ho gaya tha shahr-e-dil barbaad karna

so kar ke hausla ghaarat-gari se guftugu ki

adab ki mahfilen khinchen hain dil lekin wahan to

sabhi the be-adab so be-dili se guftugu ki

fasane be-qarari ke sunati aur kis ko

ye tera gham tha tere hijr hi se guftugu ki

amir-e-saltanat tha shaiba tak ho na paya

ki us ne yun kamal-e-ajizi se guftugu ki

qaza se mang ke mohlat phir hum ne pal-do-pal ki

ye pahli bar tha jab zindagi se guftugu ki

main lahje ke fusun mein gum thi so ye tak na samjhi

kyon us ne ab ke is waraftagi se guftugu ki

na ras aain jo hum ko mahfilen shor-o-shaghab ki

to kunj-e-gul mein ja kar KHamushi se guftugu ki

dikhai tur par main ne kuchh aise hoshiyari

ki aankhen band kar ke raushni se guftugu ki

raqam ek dastan-e-sabr hone ko thi lekin

samundar ne KHud aa kar tishnagi se guftugu ki

'tabassum' kuchh bharam rakhtin ta'aruf hone detin

yun be-KHud ho ke kyon us ajnabi se guftugu ki