na ruh-e-mazhab na qalb-e-arif na shairana zaban baqi

na rūh-e-maz.hab na qalb-e-ārif na shā.irāna zabān baaqī

zamīñ hamārī badal ga.ī hai agarche hai āsmān baaqī

shab-e-guzishta ke saaz o sāmāñ ke ab kahāñ haiñ nishān baaqī

zabān-e-shama-e-sahar pe hasrat kī rah ga.ī dāstān baaqī

jo zikr aatā hai āḳhirat kā to aap hote haiñ saaf munkir

ḳhudā kī nisbat bhī dekhtā huuñ yaqīn ruḳhsat gumān baaqī

fuzūl hai un kī bad-dimāġhī kahāñ hai fariyād ab laboñ par

ye vaar par vaar ab abas haiñ kahāñ badan meñ hai jaan baaqī

maiñ apne miTne ke ġham meñ nālāñ udhar zamāna hai shaad o ḳhandāñ

ishāra kartī hai chashm-e-daurāñ jo aan baaqī jahān baaqī

isī liye rah ga.ī haiñ āñkheñ ki mere miTne kā rañg dekheñ

sunūñ vo bāteñ jo hosh uḌā.eñ isī liye haiñ ye kaan baaqī

ta.ajjub aatā hai tifl-e-dil par ki ho gayā mast-e-nazm-e-'akbar'

abhī middle paas tak nahīñ hai bahut se haiñ imtihān baaqī

na ruh-e-mazhab na qalb-e-arif na shairana zaban baqi

zamin hamari badal gai hai agarche hai aasman baqi

shab-e-guzishta ke saz o saman ke ab kahan hain nishan baqi

zaban-e-shama-e-sahar pe hasrat ki rah gai dastan baqi

jo zikr aata hai aaKHirat ka to aap hote hain saf munkir

KHuda ki nisbat bhi dekhta hun yaqin ruKHsat guman baqi

fuzul hai un ki bad-dimaghi kahan hai fariyaad ab labon par

ye war par war ab abas hain kahan badan mein hai jaan baqi

main apne miTne ke gham mein nalan udhar zamana hai shad o KHandan

ishaara karti hai chashm-e-dauran jo aan baqi jahan baqi

isi liye rah gai hain aankhen ki mere miTne ka rang dekhen

sunun wo baaten jo hosh uDaen isi liye hain ye kan baqi

tajjub aata hai tifl-e-dil par ki ho gaya mast-e-nazm-e-'akbar'

abhi middle pas tak nahin hai bahut se hain imtihan baqi