na sath dega koi rah aashna mera

na saath degā koī raah āshnā merā

judā hai saare zamāne se rāsta merā

guzar ke aa.ī huuñ maiñ ġham ke regzāroñ se

nazar udaas hai dil hai dukhā huā merā

na jaane kis liye qātil ke ashk bhar aa.e

farāz-e-dār pe jab sāmnā huā merā

dayār-e-jāñ meñ farozāñ rahegī sham-e-hayāt

samajh liyā tirī āñkhoñ ne mudda.ā merā

kiyā hai pesh tujhe āñsuoñ kā nazrāna

hujūm-e-shām-e-alam aur dil jalā merā

vo sāneha mire dil par guzar gayā 'gulnār'

har ek harf-e-duā be-sadā huā merā

na sath dega koi rah aashna mera

juda hai sare zamane se rasta mera

guzar ke aai hun main gham ke regzaron se

nazar udas hai dil hai dukha hua mera

na jaane kis liye qatil ke ashk bhar aae

faraaz-e-dar pe jab samna hua mera

dayar-e-jaan mein farozan rahegi sham-e-hayat

samajh liya teri aankhon ne muddaa mera

kiya hai pesh tujhe aansuon ka nazrana

hujum-e-sham-e-alam aur dil jala mera

wo saneha mere dil par guzar gaya 'gulnar'

har ek harf-e-dua be-sada hua mera