na sath KHush tha bichhaD ke wo kuchh udas to hai

na saath ḳhush thā bichhaḌ ke vo kuchh udaas to hai

is e'tibār se dard-e-firāq raas to hai

asar-pazīr bhī ho gar nahīñ hai ye maqdūr

mirī bisāt meñ ik arz-e-iltimās to hai

ye shahr chhoḌ ke jaane ko jī nahīñ kartā

vo mere paas nahīñ mere ās-pās to hai

ba-zāhir us ke tar-o-tāza hoñT jo bhī kaheñ

bujhā na paa.e jo paanī unheñ vo pyaas to hai

gayā zamāna kabhī lauT kar nahīñ aatā

magar vo shaḳhs zamāna nahīñ kuchh aas to hai

kisī se tai na huā kyoñ mo.āmla dil kā

mizāj-dāñ na sahī ye adā-shanās to hai

bad-ehtiyāt nahīñ tere zikr meñ 'shaukat'

tire baġhair agarche ye bad-havās to hai

na sath KHush tha bichhaD ke wo kuchh udas to hai

is e'tibar se dard-e-firaq ras to hai

asar-pazir bhi ho gar nahin hai ye maqdur

meri bisat mein ek arz-e-iltimas to hai

ye shahr chhoD ke jaane ko ji nahin karta

wo mere pas nahin mere aas-pas to hai

ba-zahir us ke tar-o-taza honT jo bhi kahen

bujha na pae jo pani unhen wo pyas to hai

gaya zamana kabhi lauT kar nahin aata

magar wo shaKHs zamana nahin kuchh aas to hai

kisi se tai na hua kyon moamla dil ka

mizaj-dan na sahi ye ada-shanas to hai

bad-ehtiyat nahin tere zikr mein 'shaukat'

tere baghair agarche ye bad-hawas to hai